ACHA KULALAMIKA

Jana wakati nipo naandika Makala zangu nilisikia raisi mstaafu Mh. Jakaya Kikwete akizungumza maneno ambayo yalinifanya gafla niache kuandika na kusikiliza kwa makini maneno yale aliyokuwa akizungumza. Maneno hayo yalinivutia kuyasikiliza na hatimaye kupata kitu Fulani ambacho kilimenisukuma kuandika Makala hii. Mh Kikwete alisema “ Tatizo kubwa la Waafrika wengi ni kulalamika, hata wasomi tunaotegemea watatue matatizo yetu ndio wamegeuka kuwa walalamikaji wakubwa.”

Huu ni ukweli mtupu usiopingika, ndiyo maana nimeamua kupigilia msumari wa mwisho kwenye jeneza hili ambalo linawapoteza watu wengi. Lakini msumari ninaoupigilia mimi sio wa kuharibu bali wa kujenga.

Watu wengi wamekuwa walalamikaji kila kukicha, mara leo hili kesho lile yaani malalamishi hayaishi. Wasomi wengi ambao tunategemea wamepata maarifa yatakayokuja kujenga jamii zetu wao ndio wamegeuka kuwa walalamikaji wakubwa.

Ngoja nikwambie ndugu yangu, malalamishi hayajengi wala hayabadilishi chochote. Acha kulalamika kabisa maana unapolalamika unaifunga akili yako au ubongo wako ushindwe kufikiria Zaidi kuhusu suluhisho badala yake unafanya akili yako ikubari kwamba tatizo Fulani halitatuki. Ukweli ni kwamba kila tatizo lina suluhisho lakini ukiwa mtu wa kulalamika kila siku huwezi hata siku moja kuona namna ya kulitatua.

Kumbe jambo la kufanya leo kama una tabia ya kulalamika kila siku achana nayo, kwanza kabisa hakikisha tabia hiyo imekufa. Uchunguzi unaonesha kwamba tabia mpya ujengwa ndani ya siku thelathini yaani mwezi mmoja, kumbe ukilalamika kuhusu jambo Fulani unaweza kuwa mlalamikaji wa kudumu. Achana na tabia ya kulalamika.

Nakubaliana na Jack Ma mmiliki na mwanzilishi wa kampuni ya Alibaba raia wa China anayesema “Fursa zimejaa pale watu wanapolalamika.” Malalamiko ya watu ni fursa tosha. Aliyetengeneza gari alisikia watu wakilalamika kuhusu umbali mrefu na kuchoka kutembea na farasi na punda. Mwingine akaona watu wanalalamika kuhusu jua kali, akaamua kutengeneza kofia. Mwingine akaona watu wanalalamika kuhusu mvua, akaamua kutengeneza mwavuli.

Super Markets zilianza kama duka tu lakini baada ya watu kulalamika kwanini watu hawawezi kufanya manunuzi kwa kujichagulia, ndipo watu wakapata wazo la super markets. Kumbe watu wanapolalamika kumejaa fursa, watu wakilalamika kuhusu uchafu mtaani, ni fursa kwako kufungua kampuni ya usafi kwenye mtaa wako. Watu wakilalamika, kuhusu uharifu kwenye mtaa wenu, ni fursa kwako kuanzisha kampuni itakayodumisha ulinzi mtaani kwenu.

Acha kulalamika, fursa zimejaa kwenye malalamiko, watu wanapolalamika usiwe mlalamikaji pia. Na wewe msomi mwenzangu unazingua ujue unapokuwa mmoja wa walalamikaji wakati tunakutegemea kama suluhisho. Acha kuzingua, acha kulalamika.

"Mafanikio Yapo Mikononi Mwako."

Ndimi

EDIUS KATAMUGORA

AUTHOR AND MOTIVATIONAL SPEAKER

0764145476

0625951842

Email: ekatamugora@gmail.com

Karibu ujipatie kitabu changu cha BARABARA YA MAFANIKIO, Kwa shilingi 6000/= mikoani tunatuma pia.

Imani yangu ni kwamba mafanikio ni kitu cha kushirikishana, washirikishe na wenzio kile ulichojifunza.