MAENEO MATATU (3) PESA ILIKOJIFICHA (1)

Pesa imejificha katika maeneo makuu matatu, sehemu ya kwanza pesa ilikojificha ni katika uhitaji.

Biashara yoyote kubwa yenye mafanikio ni biashara inayotoa suluhu kwa mahitaji yanayohitajika katika jamii. Ukiweza kutatua uhitaji wa watu kwenye jamii yako au kutatua matatizo ya watu kwenye jamii yako pesa itakufuata.

Tatizo la watu wengi, wengi wanaoanzisha biashara zinazokufa kila kukicha ni kwasababu hawatoi majibu ya mahitaji ya watu katika jamii. Kuanzisha biashara ambayo haitoi suluhisho la mahitaji ya watu ni sawa na kujibu swali ambalo haujaulizwa.

Kijana mmoja aliyependa kusoma vitabu aliona kuna shida katika ununuaji wa vitabu akaona kuna uhitaji wa kampuni ya kuuza vitabu mtandaoni. Akaiita kampuni yake Amazon. Huyu ni Jeff Bezos ambaye leo hii anatajwa kama tajiri namba moja duniani.

Usijaribu hata siku moja kutoa huduma fulani bila kuona kama kuna uhitaji. Mimi nimeona ni vyema leo hii kufundisha mada hii kwasababu nimeona kuna watu wengi wanatamani kujua pesa inakojificha.

Pesa unayoipata au kuipokea haiendani na kitu unachokifanya lakini inaendana na uhitaji uliopo.

Jamii inayotuzunguka inauhitaji mkubwa lakini ni watu wachache wanaoona uhitaji huo. “Kuna watu hawawezi kuziona fursa hata kama zikiwapiga puani,” anasema Strive Masiyiwa.

Kuna hadithi moja ambayo watu wengi katika eneo la biashara hupenda kuizungumza, sijui umewahi kuisikia? Hadithi hiyo ipo hivi: Kampuni moja ya uuzaji wa viatu ilihitaji kupanua soko la biashara yake, hivyo ikaamua kumtuma kijana ambaye alikuwa mfanyakazi katika kampuni hiyo kwenda katika kisiwa fulani kuchunguza kama kuna uhitaji wa viatu mahali huko.

Kijana yule alipofika katika kisiwa kile akakuta watu wa kule hawavai viatu kabisa. Kijana yule akatuma ujumbe kwenye makao makuu ya kampuni yake, ujumbe huo ulisomeka; “Hakuna kabisa soko la viatu, watu wa huku hawavai viatu.” Kijana yule alirudishwa na kampuni ikaamua kumtuma kijana wa pili.

Kijana huyu alikuwa makini sio kama yule wa kwanza alipofika katika kile kisiwa na kukuta watu hawavai viatu yeye akatuma ujumbe uliosomeka, “Soko ni kubwa, tumeni makonteina ya viatu.” Kijana huyu wa pili aliona fursa. Fursa ni kama maembe, ukisubiri yaiive, wenzako wanakula na chumvi.

“Kuwa na rundo la matatizo. Usiruhusu pesa liwe tatizo mojawapo.” Ni msemo wa Grant Cardone.

Watu wengi ni maskini kwasababu hawajajitoa kutatua mahitaji yaliyoko katika jamii inayowazunguka. Jiulize swali leo, kunauhitaji wa kile unachokifanya? Je, kuna uhitaji wa huduma unayoitoa?

Unapoanza kutatua uhitaji wa watu hakikisha unaongeza thamani kwenye maisha ya watu. “Lengo la biashara ni kutengeneza wateja,” anasema Peter Drucker, guru wa mambo ya manejimenti.

Bofya hapa kusoma: MAENEO 3 PESA ILIKOJIFICHA (2)

Ili wateja waje kwenye biashara yako lazima utoe thamani. Kwa msingi huo nakubaliana na Henry Ford aliyewahi kusema, “Biashara yoyote inayotengeneza pesa pekee ni biashara ya kimaskini.” Biashara yoyote unayoona inafanikiwa ni ile inayofanya maisha ya watu yawe bora na ya kufurahia.

“Toka siku yangu ya kwanza ya kuwa mjasiriamali maono yangu makubwa ya kutimiza ni kufanya maisha ya watu yawe bora,” anasema Richard Branson, mfanyabiashara mwenye makampuni zaidi ya mia nne na mwandishi wa kitabu cha Screw It, Let's Do It.

Ukitoa huduma nzuri na bidhaa bora watu watakuwa tayari kukulipa. Watu watahitaji kufanya kazi na wewe.

Kuna aina mbili za uhitaji unazotakiwa kuzifahamu.

Aina ya kwanza ya uhitaji ni uhitaji uliopo. Anayefungua duka la nguo ametizama mahitaji ya watu katika mavazi. Aliyefungua mgahawa ametizama mahitaji ya watu katika kupata chakula safi. Anayeanzisha saluni mtaani kwako anatizama uhitaji wa watu katika kuweka vichwa vyao katika hali ya kupendeza na kuvutia. Daktari anayeanzisha zahanati au kituo cha afya ametizama uhitaji wa watu katika mambo yanayohusu afya.

Mahitaji ya pili ni yale unayoweza kutengeneza. Watu wanaweza kuwa hawaoni mahitaji ya kitu mpaka ukianzishe wewe. Inawezekana watu wengi wanalalamika kuwa uchafu umekuwa kero mtaani kwako, kumbe hiyo ni fursa ya kuanzisha kampuni ya kukusanya taka.

Watu hawakuhitaji facebook lakini Mark Zuckerberg aliona anaweza kutengeneza mtandao unaoweza kuwakutanisha watu wengi kwa wakati mmoja. Huo ndio ukawa mwanzo wa Facebook iliyoanzishwa mwaka 2004.

(Soma mwendelezo wa makala hii kupitia link hapo juu)

USISAHAU KUSHARE MAKALA HII KWA RAFIKI YAKO AJIFUNZE PIA.

NA EDIUS KATAMUGORA

Kijana wa maarifa

0764145476

ekatamugora@gmail.com

Unaweza kupata vitabu vyangu vifuatavyo:

1. BARABARA YA MAFANIKIO ==>7000/=

2. NAMNA YA KUWA MTAALAMU ==> 15000/=

Wasiliana nami kupitia namba hii 07641415476